#قواعد_PUBG
مبدأيا انا بلعب Fortnite و لعبت PUBG مؤخرا و رغم إن النطاق الجغرافي بتاعي فرنسا و رغم ان اللغة فرنسي فالواضح أن القائمين علي اللعبة هدفهم تعارف الشعوب و تلاقي الثقافات
بس الي بيحصل عكس كده تماما فبما اننا مضطرين نلعب مع بعض يبقي نتفق علي القواعد دي علشان الحرب العالمية الثالثة قربت
* مبدأيا الهدف من الشات في اللعبة هو اولا التعاون و ثانيا الإستراتيجية في اللعب لأن ده طريق الفوز الوحيد و ثالثا و ده الاهم طبعا الشقط يبقي نحترم رغبات بعضنا يا جماعة
* أحب أوضح لحضرتك إنك لما بتفتح المايك و إحنا بنسمع الأصوات المحيطة بيك آكتر ما بنسمع صوتك و ده مش تطفل لاسمح الله انما تركيز في اللعب
* لو ها تلعب PUBG يبقي لازم تقضي كل حاجاتك الإنسانية قبل ما تلعب و تفتح المايك أبوس أيدك ولما بقول كل حاجاتك يبقي كل حاجات مفهومة و إذا أضطريت يبقى تقفل المايك سهلة يعني
* لو أنت متجوز و ها تلعب PUBG يبقي لازم تحل كل مشاكلك الزوجية قبل ما تلعب و تنهوا كل النقاشات الأسرية و تسكت الواد لو سمحت و تحدد ها تتنيل تاكل إيه بكرة أو تلعبوا سوا أريح و بالنسبة للعواطف فدي أكيد بنقفل فيها المايك
* خلافتنا الشخصية ما تأثرش علي لعبنا مع بعض و الكلام ده موجه لأحمد و ضحي أولاد المهندس أشرف من إسكندرية و يا ضحي بلاش تفتني علي احمد عند بابا تآني لو سمحتي
* لو نزل معاك إسرائيلي و إسمه افيخاي بلاش أول قنبلة يلاقيها الفريق تنضرب فيه و نقف كلنا نتفرج عليه ذليل بيزحف علشان حد يعمله revive لإنه علي آخر لحظة ها يفتح المايك و يعترف إنه احمد الشربيني من المنصورة و دي كانت خطته أصلا يعملها في حد إسرائيلي علي فكرة الاسرائيلين عندهم اسامي تآنية غير افيخاي و بطلوا يسموا راشيل من أيام محمد فوزي
* بالنسبة لموضوع اكو عرب بالطيارة أحب أقول لحضرتك كلنا عرب و اولنا الاستاذ استيڤن إلي حاطط علم أمريكا دا يبقي احمد الشربيني من المنصورة بعد ما تاب و بطل يعمل إسرائيلي
* مش كل إلي بيقفل المايك بنات يا جماعة في ناس زي حلاتي بتبقي مش عايزة تزود الزحمة في منتدي فتكات علشان الاخ حمد من العراق تعب آوي نص ساعة بيقولى je t'aime Paris
* علي اد فرحتى بعد أسبوع لعب تقريبا لما ربنا سترني و لبست بنطلون أخيرا و كنت فقدت الامل في الموضوع ده خصوصا و أنا طلعي كل الهدوم عدا البنطلون علي اد ما بحترم جماعة ال nudist الي بيقلعوا قبل الطيارة و يجروا بحريه نحترم توجهات بعض يا جماعة
* اللعبة دي الفوز فيها بالبقاء علي قيد الحياة للاخر اقسم بالله مش باكتر حد بيجمع ذخيرة و مناظير
* لو عايز تقتل و تاخد ال loot يبقي تلعب لوحدك انما تلعب في فريق يبقي يا تقتل يا تاخد ال loot معروفة يعني
* أنا بعلن رفضي للتحرش الجماعي إلي بيحصل لأي بنت عريانة قبل ما نطلع الطيارة مش فاهم سيكولوجية الاخوة إلي بيتجمعوا حوالين أي بنت عريانة إيه
* لما تقع البنت الي في الفريق مش لازم كلنا نروح لها دا revive مش ها تبوسها في بوقها يعني بلاش الشهامة الي بتضيع الفريق كله كمان بلاش نمشي كلنا لازقين فيها دا مش كورنيش حضرتك صدقني نهاية التمشية قناص يخلص عليكم
ليست هناك تعليقات:
إرسال تعليق