لعنة ديونيسوس

#لعنة_ديونيسوس

ديونيسوس واحد من اشهر الآلهة في المثيولوجيا اليونانية وده لاسباب كتيرة اهمها انه آله النبيذ و النشوة و السعادة و الفرح حاجة كده كوكتيل فرفشة يعني لدرجة ان كل التماثيل و الايقونات الخاصة بيه بيظهر فيها بكاس و عنقود عنب و ده لان زيوس خلاه يعلم البشر ازاي يزرعوا العنب و يعملوا نبيذ و يسكروا ينبسطوا و الواضح ان ديونيسوس كان نقطة ضعف زيوس مش بس لانه ابنه و لكن لان ام ديونيسوس ماتت قبل ما تولده ايوا انت قرات صح ماتت قبل ما تولده و زيوس كمل الحمل مكانها لان هيرا قتلت ام ديونيسوس او اتسببت في موتها نظام غيرة ضراير المهم ان ديونيسوس بقي نقطة ضعف زيوس علشان يتيم فرغم انه نص اله لان امه بشرية بس زيوس خلاه ارتقي الاوليمب و بقي اله و كمان مسكه الفرفشة بس فضل ديونيسوس نقطة ضعف لزيوس برضوا لدرجة انه لمًا غلط و رغم ان الميثولوجيا اليونانية مش واضح فيها ايه غلطة ديونيسوس بس فيه مقولة شهيرة بتقول ان المثيولوجيا اليونانية ما كنتش ها تزيد عن صفحتين لو مكانش زيوس زير نساء فنقدر نستنتج ان ديونيسوس غلط مع واحدة تخص ابوه و علشان هو نقطة ضعف ابوه فكان عقابه مخفف و هو الي عرف بعد كده بلعنة ديونيسوس و هي ان زيوس لعن ديونيسوس بانه كل اما يجي يمسك او يشرب نبيذ يتحول مية حتي لو حد صبه في بقه مجرد ما يقرب من شفايفه يتحول مية 

الحقيقة الي خلاني احكي حكاية لعنة ديونيسوس اني من اول فصل الشتا و انا مصاب بلعنة تشبه لعنة ديونيسوس من سنين طويلة و انا اتعودت اخد دوش بمية باردة مهما كان البرد و درجة الحرارة و في اي طقس و من بداية فصل الشتا ده و كل اما احاول اخد دوش بمية دافية سواء لاني مجهد او اي سبب دايما الاقي اما السخان عطلان او ضغط المية مش كافي او اي سبب حتي لمًا نزلت اكتر من مرة في اوتيلات لدرجة خلتني كل اما افكر اخد دوش مية ساخنة و تفشل الفكرة افتكر لعنة ديونيسوس